33

قومی کرکٹ ٹیم کیلئے نئے کوچز کا انتخاب کر لیے جانے کی اطلاعات

لاہور(نیوزڈیسک) قومی کرکٹ ٹیم کیلئے نئے کوچز کا انتخاب کر لیے جانے کی اطلاعات، پاکستان کرکٹ ٹیم کی جانب سے ہیڈ کوچ، باولنگ کوچ اور بیٹنگ کوچ کے ناموں کا باقاعدہ اعلان آئندہ چند روز میں کیا جائے گا۔ تفصیلات کے مطابق سابق فاسٹ بالر وقار یونس ایک مرتبہ پھر ٹیم مینجمنٹ میں اہم عہدہ سنبھالنے کیلئے مضبوط امیدوار بن گئے ہیں۔ ذرائع کے

مطابق پی سی بی کے پانچ رکنی پینل نے پہلے اجلاس میں ہیڈ کوچ اور بالنگ کوچ کیلئے انٹرویوز مکمل کرلئے۔ ذرائع کے مطابق سابق کپتان مصباح الحق ہیڈ کوچ جبکہ سابق ہیڈ کوچ وقار یونس باﺅلنگ کوچ کیلئے مضبوط امیدوار ہیں۔ واضح رہے کہ پانچ رکنی پینل میں شامل چیف ایگزیکٹو پی سی بی وسیم خان، ڈائریکٹر انٹرنیشنل کرکٹ ذاکر خان، گورننگ بورڈ کے رکن اسد علی خان، سابق کپتان انتخاب عالم اور بازید خان نے امیدواروں کے انٹر ویوز کئے۔ ڈین جونز سمیت غیر ملکی امیدواروں کے انٹرویوز ویڈیو لنک کے ذریعے ہوئے۔مقامی امیدواروں میں سب سے پہلے وقار یونس انٹرویو کیلئے قذافی اسٹیڈیم پہنچے۔ کنڈیشننگ کیمپ کے ابتدائی سیشن کے بعد مصباح الحق انٹرویو کیلئے آئے جبکہ سابق ٹیسٹ اوپنر محسن حسن خان کراچی سے انٹرویو دینے پہنچے تھے۔سابق فاسٹ بالر محمد اکرم بالنگ کوچ کی دوڑ سے باہر ہو گئے ہیں۔ ذرائع کا کہنا ہے کہ محمد اکرم امیدواروں میں سینئرز اور خاص طور پر وقار یونس کی موجودگی کی وجہ سے اپنی درخواست سے دستبردار ہو ئے۔ انہوں نے اس بارے میں بدھ کی شب بورڈ کو آگاہ کردیا تھا۔بیٹنگ کوچ اور اسٹرینتھ اینڈ کنڈیشننگ کوچ کا

فیصلہ بعد میں ہوگا۔ ذرائع کے مطابق مصباح الحق ہیڈ کوچ کیلئے مضبوط ترین امیدوار ہیں جبکہ وقار یونس کے بالنگ کوچ بننے کے قوی امکانات ہیں۔ ذرائع کے مطابق وقار یونس کے ساتھ صرف معاوضے کے حوالے سے کوئی رکاوٹ پیدا ہو سکتی ہے ورنہ وہ مصباح الحق کے ساتھ کام کرنے میں کوئی دشواری محسوس نہیں کر رہے۔واضح رہے کہ جب وقار یونس قومی ٹیم کے ہیڈ کوچ تھے تو اس وقت شاہد آفریدی سمیت سینئر کرکٹرز سے ان کے شدید اختلافات تھے۔ ذرائع کے مطابق بالنگ کوچ کے طور پر انہیں زیادہ مشکل نہیں ہو گی کیونکہ قومی ٹیم اس وقت نوجوان بالرز پر مشتمل ہے۔ ذرائع کا کہنا ہے کہ مصباح الحق کے ہیڈ کوچ بننے کی صورت میں ہائی پروفائل بیٹنگ کوچ کی خدمات حاصل نہیں کی جائیں گی بلکہ بورڈ اپنے کوچز میں سے کسی کو ذمہ داری سونپ سکتا ہے۔

اس خبر پر اپنی رائے کا اظہار کریں

اپنا تبصرہ بھیجیں